ਸੂਰਜ ਦੀ ਬਾਤ
=========
ਮੁਬਾਰਕ ਤੈਨੂੰ ਦੋਸਤਾ!
ਚਾਨਣੀ ਰਾਤ ਦੀਆਂ ਚਗਲਾਂ
ਮੈਂ ਤਾਂ ਕਾਲੀ ਬੋਲੀ ਰਾਤ ਤਾਈਂ
ਸੂਰਜ ਦੀ ਬਾਤ ਪਾਉਣੀ
ਹਸਰਤ ਤੇਰੀ ਜੇ
ਟਿਕੀ ਝੀਲ ਬਨਣਾ
ਰੀਝਾ ਮੇਰੀ
ਅੱਤੀਂ ਅੱਲਖ ਜਗਾਉਣੀ
ਬਸ, ਬਹੁਤ ਹੋ ਚੁੱਕੀ
ਹੋਂਦਵਾਦੀ ਮੁਸ਼ੱਕਤ
ਇਹ ਬੇ-ਮਾਇਨਗੀ, ਅਸਾਂ
ਨਾ ਹੁਣ ਹੋਰ ਹੰਢਾਉਣੀਂ।
ਪੜਪੰਚੀ ਪੈਗੰਬਰ
ਬੇ-ਮੁਸੱਲਸਲ ਮਸੀਹਾ
ਤੁਅੱਸਬੀ ਇਹ ਨਾ
ਮੈਨੂੰ ਰਾਸ ਆਉਣੀ
ਮੇਰੀ ਤੌਬਾ ਖ਼ੁਦਾ ਤੋਂ
ਐ ਖ਼ੁਦਾਵੰਦ ਲੋਕੋ!
ਹੁਣ ਬਾਕੀ ਬਚੀ
ਲੇਖੇ ਕੁਫ਼ਰਾਂ ਦੇ ਲਾਉਣੀ
ਹੋ ਦਾਇਰਿਉਂ ਮੁਕਤ
ਹਰ ਲਫ਼ਜ਼ ਮਾਣੇ ਆਜ਼ਾਦੀ
ਸ਼ਬਦਕੋਸ਼ਾਂ ਖਿਲਾਫ਼
ਐਸੀ ਸਾਜਿਸ਼ ਰਚਾਉਣੀ
ਮੁੱੜ ਹਰ ਜਾਏ
ਕੁੱਖ ਤਵਾਰੀਖ ਦੀ
ਕੋਈ ਖ਼ੁਰਾਫ਼ਾਤ ਐਸੀ
ਅਸਾਂ ਕਰ ਕੇ ਵਿਖਾਉਣੀ
ਹਸਰਤ ਤੇਰੀ ਜੇ
ਟਿਕੀ ਝੀਲ ਬਨਣਾ
ਰੀਝਾ ਮੇਰੀ
ਅੱਤੀਂ ਅਲਖ ਜਗਾਉਣੀ।
-ਸਮਰਬਲਦੇਵ ਧਾਲੀਵਾਲ
